Landsréttur hefur staðfest úrskurð Héraðsdóms Reykjavíkur um gæsluvarðhald yfir albönskum manni til 24. september.
Maðurinn er grunaður um að hafa reynt að smygla til landsins rétt tæplega hálfu kílói af kókaíni, en hann tók á móti póstsendingu með gerviefnum sem lögregla hafði komið fyrir í stað fíkniefnanna sem send voru til landsins. Veitti lögregla manninum eftirför og handtók hann skömmu eftir að hann hafði móttekið póstsendinguna.
Maðurinn framvísaði fölsuðu vegabréfi er lögregla krafði hann skilríkja. Hann gaf síðan upp rétt nafn í samskiptum við lögreglu og kom þá í ljós við uppflettingu í upplýsingakerfi Schengen að maðurinn er í virku tveggja ára endurkomubanni til landsins sem var sett á hann í febrúar á þessu ári. Er maðurinn því í ólöglegri dvöl á landinu.
Lögregla telur að maðurinn eigi sé samverkamenn varðandi kókaínsmyglið og hafa aðrir menn verið handteknir í tengslum við rannsókn málsins. Í rökstuðningi lögreglustjóra fyrir gæsluvarðhaldi yfir manninum segir meðal annars:
„Að mati lögreglu er fram kominn rökstuddur grunur um að kærði ásamt meintum samverkamönnum hafi undirbúið og loks staðið að innflutningi fíkniefna hingað til lands og jafnframt staðið í sölu fíkniefna hér á landi. Mikilvægt er að upplýsa um meinta samverkamenn og rannsaka betur þátt kærða. Eru brot kærða og meintra samverkamanna hans talin varða við fíkniefnalög nr. 65/1974, sem varðað geta fangelsi allt að 6 árum.“
Click here to preview your posts with PRO themes ››
Albanir sagðir stórtækir í fíkniefnasölu hér á landi
Fyrir nokkrum vikum birti DV viðtal við mann sem tengist fíkniefnaheiminum á Íslandi. Staðhæfði maðurinn að albanskir aðilar hafi náð 80-90% af sölu á kannabis og kókaíni hér á landi. Sagði maðurinn að ókunnir albanskir aðilar nýti sér starfskrafta landa sinna sem komi hingað til lands til stuttrar dvalar sem ferðamenn og selji fíkiniefni. Þeir séu síðan leystir af hólmi af öðru sölufólki innan tveggja til þriggja mánaða.
