Athygli vakti þegar Arnar Þór Jónsson, héraðsdómslögmaður, fyrrverandi þingmaður Sjálfstæðisflokksins og forsetaframbjóðandi, tilkynnti um stofnun nýs flokks, Lýðræðisflokksins.
Fyrir skömmu átti Arnar í viðræðum við Miðflokkinn um inngöngu í flokkinn. Slitnaði upp úr þeim viðræðum. DV hefur fengið ábendingar um að Arnar hafi verið með nokkuð stífa kröfugerð við Miðflokkinn og meðal annars krafist þess að hann færi strax á launaskrá hjá flokknum. Enn fremur hafi hann, eftir fund sinn með flokknum, komið þeirri hugmynd á flot að hann tæki við formennsku í Miðflokknum eftir tvö ár.
Samkvæmt heimildum innan úr Miðflokknum kom fram krafa frá Arnari um að hann yrði launaður starfsmaður flokksins á fundi aðila. Miðflokksmenn vilja samt ekki tjá sig neitt opinberlega um viðræður sínar við Arnar og telja það ekki vera Miðflokknum til hagsbóta. Heimildir DV herma þó engu að síður að þeim hafi þótt fundurinn sérkennilegur og hann vakið þeim þá tilfinningu að Arnar hyggði á yfirtöku á flokknum.
Er DV hafði samband við Arnar neitaði hann því með öllu að hafa krafist þessa að fara á launaskrá hjá flokknum. Hins vegar kunni sú hugmynd að hafa leitað upp á yfirborðið í viðræðunum. „Það voru ýmsar hugmyndir reifaðar en ég gerði aldrei neinar ófrávíkjanlegar kröfur,“ segir hann.
Samkvæmt heimildum DV bað Miðflokkurinn um skriflegar hugmyndir frá Arnari um samstarfið og í þeim texta kom fram hugmyndin um að hann færi á launaskrá hjá flokknum, ásamt ýmsu öðru.
Click here to preview your posts with PRO themes ››
Hann telur að hugmyndafræðilegar ástæður séu fyrir því að ekki náðist saman með aðilum. „Við nálguðumst málin á ýmsum sviðum og það voru ýmsar hugmyndir reifaðar en þetta náði aldrei svo langt að þær væru teknar til afgreiðslu.“
Hann segir hins vegar ekki vera rétt eða heiðarlegt að greina í smáatriðum frá því sem fólki fór á milli í þessum viðræðum, slíkt væri trúnaðarbrestur og hann gæti ekki sagt frá efni viðræðnanna í smáatriðum. En ágreiningur milli aðila hafi verið hugmyndafræðilegur.
„Það kom í ljós að Miðflokkurinn vill vera miðflokkur en ég lagði áherslu á þörfina fyrir borgaralegan, frjálslyndan, hægri sinnaðan flokk,“ segir Arnar og játar aðspurður að þessar áherslur hans hafi ekki fengið nægilegan hljómgrunn í viðræðunum. „Það þarf nefnilega tvo til að dansa tangó,“ segir hann.
Arnar segist mjög sáttur við og spenntur með þá stöðu sem komin er upp núna, en hann vinnur núna hörðum höndum að stofnun Lýðræðisflokksins.
„Ég er ánægður með stöðuna sem núna er uppi. Ég ætla að gefa sjálfum mér svigrúm til að nálgast þetta á ferskum grunni.“
