Guðbjörn Guðbjörnsson, yfirtollvörður og óperusöngvari, segir að ekkert réttlæti sé til fyrir íslenskum dómstólum. Tilefnið er sýknudómur yfir Albert Guðmundssyni knattspyrnumanni sem ákærður var fyrir nauðgun.
Sjá einnig: Dómurinn yfir Albert
Dóttir Guðbjörns kærði byrlun og nauðgun fyrir nokkrum árum, en hún var þá 16 ára. Hinn ákærði í málinu var sýknaður fyrir dómi og dóttir Guðbjörns tók síðan líf sitt. Guðbjörn ræddi um kynferðisbrotið við DV árið 2017, sjá hér, og hann tjáði sig aftur um örlög dóttur sinnar og Metoo-byltinguna árið 2021, sjá hér.
Í pistli á Facebook-síðu sinni í kvöld segir Guðbjörn að hann telji okkur þurfa nýja Metoo-byltingu. Hann segir það reglu en ekki undantekningu að þolendur nauðgana séu metnar ótrúverðugar vegna þess að þær eru undir álagi og stressi fyrir dómi og fara því ekki endilega rétt með allt saman. Í viðtali við DV árið 2017 sagði hann: „Dóttir mín gerði nánast allt rétt í málinu. Hún fór á neyðarmóttökuna og fékk áverkavottorð og svo framvegis. Lögregla stóð sig líka vel og rannsóknin var til fyrirmyndar. Saksóknari stóð sig líka eins og hetja. Þrátt fyrir þetta var maðurinn sýknaður fyrir Héraðsdómi og aftur fyrir Hæstarétti. Þetta mál lék dóttur mína hræðilega. Hún flosnaði upp úr námi og er varla búin að jafna sig enn þann dag í dag. Engu að síður er hún smám saman að skríða saman eftir þessa skelfilegu reynslu.“ – Dóttir Guðbjörns tók síðan eigið líf nokkrum misserum síðar.
Pistill Gubjörns í kvöld er eftirfarandi:
Click here to preview your posts with PRO themes ››
„Sætur fótboltastrákur nauðgar stelpu, auðvitað algjörlega og gjörsamlega óhugsandi. Að svipaðri niðurstöðu komust dómstólar að fyrir um 10 árum síðan varðandi dóttir mína, sem núna er dáin. Hún lést eftir að verða lyfjafín að bráð, sem má rekja til þessarar nauðgunar. Sæti fótboltastrákurin er enn þarna úti og sennilega enn nauðgandi.
Stúlku, sem hefur verið nauðgað, er síðan dregin fyrir dómstóla og hún þykir ótrúverðug, þar sem hún er undir álagi og stressi, þetta er reglan en ekki undantekningin. Álagið sem kona er undir við slíkar aðstæður er þannig að enginn getur ímyndað sér það. Af þeim sökum kæra flestar konur ekki nauðgun. Því miður ættu konur ekki að kæra nauðgun, því þetta er nær alltaf ef ekki alltaf niðurstaðan.
Ég þekki þetta sem vitni fyrir héraðsdómi – grátandi í réttarhöldum – og sem faðir dóttur sem var nauðgað. Hræðilegt er að horfa upp á slíkt nokkrum árum eftir að ég hélt að okkar samfélag hefði lært eitthvað – við höfum ekki lært neitt. Mín ráðlegging er – því miður – til fórnarlamba nauðgana: Ekki kæra ef ykkur er nauðgað, látið þetta einfaldlega yfir ykkur ganga. Réttarkerfið mun ekki hjálpa ykkur. Ég held að við þurfum hreinlega nýtt „me too“ tímabil.
Sætir fótboltastrákar af réttum ættum halda áfram að nauðga stelpum af ómerkilegum ættum.
Réttlæti fyrir íslenskum dómstólum – hef aldrei heyrt um slíkt!
Lærðu að spila almennilegan fótbolta og þú ert sýknaður!“
