Héraðsdómur Suðurlands hefur dæmt Ingólf Kjartansson í átta ára fangelsi fyrir ýmis afbrot innan veggja fangelsisins að Litla Hrauni.
Þyngst vegur brot sem framið var fimmtudaginn 23. nóvember árið 2023 er Ingólfur stakk mann ítrekað í efri hluta líkamans með oddhvössu sporjárni með 8,5 cm málmenda. Brotaþoli hlaut átta stungusár og gat á lunga með samfalli, en lifði árásina af.
Fyrir þessa árás var Ingólfur ákærður fyrir tilraun til manndráps. Dómari taldi hins vegar ekki hafið yfir skynsamlegan vafa að hann hafi haft ásetning um að svipta brotaþola lífi.
Ingólfur var einnig sakfeldur fyrir fimm önur brot í fangelsinu sem framin voru árið 2022, meðal annars fyrir að hafa slegið annan fanga hnefahöggi utandyra við fangelsið, en brotaþoli hlaut heilahristing með skammvinnu meðvitundarleysi, mar og bólgu við hægra kinnbein, skurð á utanverðri vör og skurð á innanverðri vör.
Hann var einnig sakfelldur fyrir að hafa ráðist á lögreglumann innandyra í fangelsinu og sparkað í hné hans.
Ennfremur var hann sakfelldur fyrir að hafa ráðist á fangavörð innandyra í fangelsinu og slegið hann hnefahöggi í andlitið.
Click here to preview your posts with PRO themes ››
Hann var einnig fundinn sekur um að hafa hrækt á fangavörð og hótað fangavörðum og fjölskyldum þeirra lífláti og líkamsmeiðingum.
Sem fyrr segir var Ingólfur dæmdur í 8 ára fangelsi. Hann var dæmdur til að greiða sakarkostnað upp á tæpar sex milljónir króna. Einnig var hann dæmdur til að greiða miskabætur fyrir vel á þriðju milljón króna.
Dóminn má lesa hér.
Skotárás og rapptónlist
Ingólfur er fæddur árið 2002 og er með töluverðan brotaferil. Hann hlaut átta ára fangelsisdóm fyrir skotárás á mann í Ingólfsstræti aðfaranótt sunnudagsins 13. febrúar árið 2022, en málið vakti landsathygli og mikinn óhug.
Innan veggja fangelsisins hefur Ingólfur lagt stund á rapptónlist og ræddi hann lítillega um það í viðtali við DV vorið 2023. Sjá tengil hér að neðan.
