Indhold
„Gagnrýni mín beindist að sérstakri klíku: róttækum íslenskum konum sem hafa sölsað undir sig áhrifastöður, kæft fjölbreytni skoðana, skapað eitrað andrúmsloft óumburðarlyndis og leitt þjóðina í núverandi upplausn,“ segir Rajan Parrikar, indverskur karlmaður sem búsettur er hér á landi, í nýrri aðsendri grein á Nútímanum.
Grein sem Rajan skrifaði um liðna helgi á vef Nútímans um íslenskar konur vakti mikla athygli og úlfúð. Í grein sinni sagði hann berum orðum að íslenskar konur eigi eftir að leiða þjóðina til glötunar. Þá einkum konur sem hafi „misnotað kvenréttindabaráttuna í eigin þágu og sölsað til sín valdastöður þrátt fyrir einfeldningshátt og vanhæfni“.
Reynt að æsa fólk upp
Mátti lesa úr grein hans að hann væri ósáttur við frjálslyndar íslenskar konur sem kenna sig við femínisma, ósáttur við kynfrelsi þeirra og hversu óbundnar þær séu af gömlum hugmyndum um hlutverk kynjanna.
Sjá einnig: Úlfúð út af grein innflytjanda um íslenskar konur – „Þetta bara hlýtur að vera tilbúningur til að æsa fólk upp“
Sem fyrr segir vakti grein Rajan mikla athygli um síðustu helgi eins og DV greindi frá og furðuðu margir sig á því að Nútíminn hafi birt greinina. „Þetta bara hlýtur að vera tilbúningur til að æsa fólk upp. Trúi ekki öðru,“ sagði til dæmis ein í Baráttuhópi gegn ofbeldismenningu á Facebook.
Loks vildu einhverjir meina að greinin væri skrifuð af einhverjum öðrum en Rajan. Íslenskan í greininni væri fáguð og efni hennar til þess fallið að vekja reiði, ýta undir fordóma og auka skautun.
Hugsunarlausir og óupplýstir einstaklingar
Nú hefur Rajan skrifað aðra grein á vef Nútímans þar sem hann svarar þeim gagnrýnisröddum sem hann hefur fengið.
„Nýleg grein mín, Íslenskar konur – leiða þjóðina til tortímingar, hefur vakið hörð viðbrögð. Þótt ég sé ekki á Facebook eða í öðrum bergmálshellum samfélagsmiðla sem Íslendingar sækja, hef ég fengið sýnishorn af þeirri úlfúð sem greinin vakti. Þessi athugasemd er viðbragð mitt við hluta þessara viðbragða,” segir Rajan í byrjun nýju greinarinnar og heldur svo áfram:
„Leyfum okkur að afgreiða hina barnalegustu mótbáru fyrst: hneykslan yfir því að „Indverji“ hafi dirfst að skrifa þetta. Slík viðbrögð eru auðkenni hugsunarlausra og óupplýstra einstaklinga. Þeir sem búa yfir þroskaðri hugsun meta röksemdir út frá gildi þeirra, ekki uppruna sendiboðans. Væri reiðin ykkar önnur ef Íslendingur hefði skrifað þetta? Ef svo er, mæli ég með að þið einblínið minna á uppruna minn og frekar á innihald gagnrýninnar.“
Click here to preview your posts with PRO themes ››
Eins og hormónabólgnir unglingar
Rajan segir að önnur athugasemd sem hann fékk hafi snúið að því að hann hafi á ósanngjarnan hátt einbeitt sér að íslenskum konum. Með því hafi fylgt „nöldur“ um að íslenskir karlar séu ekki hafnir yfir gagnrýni.
„Það, auðvitað, er sjálfsögð staðreynd. Margir íslenskir karlmenn á fimmtugs- og sextugsaldri haga sér eins og hormónabólgnir unglingar, fastir í stöðnuðu þroskaferli. Ætlun mín var hvorki að afmá þeirra brot né að semja yfirgripsmikla ásökun um öll samfélagsmein sem hrjá Ísland. Gagnrýni mín beindist að sérstakri klíku: róttækum íslenskum konum sem hafa sölsað undir sig áhrifastöður, kæft fjölbreytni skoðana, skapað eitrað andrúmsloft óumburðarlyndis og leitt þjóðina í núverandi upplausn.“
Hann snýr sér svo að Katrínu Jakobsdóttur, fyrrverandi forsætisráðherra, og samherja hennar, sem hann segir hafa verið arkitekta innflytjenda- og samfélagsstefnu sem hafi leitt Ísland að „lýðfræðilegri hengibrún“ á sama tíma og menn eins og Bjarni Benediktsson „horfðu þægilega“ í aðra átt.
„Á nokkrum áratugum er líklegt að Íslendingar verði minnihluti í eigin landi. Þessi raunveruleiki – sem er að gerast fyrir augunum á ykkur – er afsprengi sömu öfgamanna- og kvenna sem telja börn ykkar þurfa kynni af klámi í leikskóla. Að gagnrýna þau beint er ekki aðeins réttmætt; það er nauðsynlegt.“
„Íslenskar konur fastar í meðalmennsku“
Pistill Rajan um síðustu helgi var meðal annars til umræðu í hópnum Afhjúpum kvenfyrirlitningu, rasisma og almennt hatur á samfélagsmiðlum. Þar var meðal annars bent á að Rajan hefði í engu minnst á þau hrottalegu ofbeldismál sem koma reglulega upp á Indlandi þar sem konum og börnum er nauðgað og myrt með ógeðfelldum hætti.
Þessu svarar Rajan svona í nýjustu grein sinni:
„Svo eru það þeir sem grípa til áreiðanleika Wikipedia og vísa í dökkar tölfræði um nauðganir og ofbeldi gegn konum í Indlandi sem meint andsvar við athugasemdum mínum um indverskar konur. Þeir sanna óafvitandi það sem ég er að segja: að þrátt fyrir gríðarlegar áskoranir hafa indverskar konur náð eftirtektarverðum árangri, klifið tinda í iðnaði, stjórnmálum, vísindum og fleiru. Í samanburði eru íslenskar konur fastar í meðalmennsku og kjósa frekar hlýja laug sjálfsupphafningar fram yfir raunverulegan árangur,“ segir hann meðal annars. Greinina endar hann á þessum orðum:
„Enn undarlegri er valkvæð reiði gagnrýnenda minna. Þeir eru fljótir að vopnvæða tölfræði um ofbeldi á Indlandi en þegja um ofbeldi og misnotkun sem átt hefur sér stað hér á Íslandi – glæpi framda af mönnum frá MENAPT-löndunum sem þeir börðust fyrir að fá hingað til lands. Á þeim nótum: Gleðileg jól!“
