Kolbrún Bergþórsdóttir, hin reynda fjölmiðlakona, horfði á kosningavökuna hjá RÚV á laugardagskvöld eins og svo margir landsmenn. Hún segir að kosningavakan hafi verið vel heppnuð en eitt olli henni þó ákveðnum vonbrigðum.
„Ljósvakahöfundur hefur lengi litið á Boga Ágústsson fréttamann og Ólaf Þ. Harðarson prófessor sem hinar einu sönnu stjörnur íslensks kosningasjónvarps. Að þessu sinni virtist RÚV ekki alveg sammála því,“ segir Kolbrún í Ljósvakapistli í Morgunblaðinu í dag.
Kolbrún segir að það hafi alls ekki sést nógu mikið af þeim tveimur á skjánum á þessu langa kosningakvöldi.
„RÚV vildi greinilega að kosningasjónvarpið væri skemmtilegt og lagði því allnokkra áherslu á að finna fyndið fólk til að tala við, þar á meðal grínista og uppistandara. Þar stóðu allir sig nokkuð vel. Um leið gleymdist að Bogi og Ólafur eru líka fyndnir og mjög afslappaðir. Þeir eru eins og heimilisvinir. Alltaf velkomnir,“ segir Kolbrún og bætir við að þess vegna hafi verið vonbrigði hversu lítið pláss þeir fengu.
Click here to preview your posts with PRO themes ››
„Ekki sást þó á þeim að þeim þætti freklega gengið á sinn hlut. Þeir nýttu tíma sinn vel, voru skemmtilegir, fræðandi, kurteisir og prúðir. Fyrir utan félagana tvo var skemmtilegasta augnablikið þegar Kristín Gunnarsdóttir og Ólöf Skaftadóttir gerðust svo framhleypnar að nefna leiðinlegasta þingmanninn. Það var fyndið og ósvífið en nafn þess þingmanns verður ekki nefnt hér, kurteisinnar vegna.“
