Lögreglan á höfuðborgarsvæðinu hefur sent frá sér tilkynningu varðandi líkamsárás í Grafarvogi í nótt sem greint var frá í fjölmiðlum.
Í tilkynningunni kemur fram að brotaþoli var með lífshættulega stunguáverka á líkamanum eftir árásina. Tveir voru handteknir vegna málsins og hafa verið yfirheyrðir í dag. Brotaþoli og meintir árásarmenn eru á þrítugs- og fertugsaldri. Tilkynningin er eftirfarandi:
„Um klukkan þrjú sl. nótt var lögreglu tilkynnt um líkamsárás í Grafarvogi þar sem hnífi hafði verið beitt. Lögregla fór þegar á vettvang og hafði töluverðan viðbúnað vegna málsins. Tveir voru handteknir og hafa þeir verið yfirheyrðir í dag. Þolandi var með lífshættulega stunguáverka á líkama og var hann fluttur á bráðamóttöku Landspítalans í Fossvogi þar sem gert var að sárum hans. Málsaðilar eru á þrítugs-og fertugsaldri.
Ekki verða veittar frekari upplýsingar um málið að svo stöddu.“
