Fyrrverandi rekstraraðili Kolaportsins, Kolaportið ehf, hefur verið tekinn til gjaldþrotaskipta. Félagið skuldaði Reykjavíkurborg um 200 milljónir króna í húsaleigu fyrir sölupláss í Kolaportinu þar sem rekinn hefur verið fjölbreyttur flóamarkaður og um helgar árum saman.
Húsnæði Kolaportsins við Tryggvagötu 19 er í eigu ríkisins. Borgin hefur leigt plássið af ríkinu og síðan framleigt það til Kolaportsins ehf, sem eins og áður segir hefur ekki staðið í skilum með leigu.
Þær upplýsingar fást innan úr borgarkerfinu að málið sé ekki lengur á forræði borgarinnar. Samkvæmt heimildum DV setur borgin sig ekki upp á móti því að áfram verði rekinn götumarkaður í húsnæðinu og ljóst er að Kolaportið verður opið um næstu helgi. Að öðru leyti er vísað til skiptastjóra þrotabús Portsins ehf, en það er lögmannastofan LOGOS.
Click here to preview your posts with PRO themes ››
DV hafði samband við LOGOS og fékk þau svör að félagið tjái sig að svo stöddu ekki með neinum hætti um gjaldþrot Portsins og gefur LOGOS engin svör um afstöðu sína til reksturs götumarkaðar í húsinu að Tryggvagötu 19.
Leigusamningur borgarinnar við ríkið um afnot af húsnæðinu að Tryggvagötu 19 rennur út um áramótin. Engin áform eru um framhaldið og ekki er vitað til þess að ríkið sé með sérstakar áætlanir um afnot af húsinu.
Ljóst er að starfsemi Kolaportsins til frambúðar er í fullkominni óvissu.
