Ungi pilturinn sem grunaður er um að hafa stungið þrjú ungmenni með hníf á Menningarnótt hefur verið fluttur í fangelsið á Hólmsheiði.
Greint var frá þessu í hádegisfréttum RÚV en pilturinn, sem er sextán ára gamall, var fluttur í morgun frá Stuðlum. Fréttastofa RÚV hefur þær upplýsingar að þetta hafi verið gert til að tryggja öryggi hans vegna líflátshótana sem honum hafa borist.
Héraðsdómur Reykjavíkur féllst í morgun á kröfu lögreglu um áframhaldandi gæsluvarðhald yfir piltinum og verður hann í varðhaldi til 26. september á grundvelli almannahagsmuna. Eins og fram hefur komið er hann grunaður um að hafa stungið tvær stúlkur og einn pilt en önnur stúlknanna slasaðist mjög alvarlega og er enn í lífshættu.
Í frétt RÚV kom fram að lögregla og sérsveit ríkislögreglustjóra hefðu haft sýnilega viðveru við Stuðla síðan á miðvikudag. Þegar ekki var talið að lengur væri hægt að tryggja öryggi hans þar var hann færður á Hólmsheiði þar sem honum var komið fyrir í fjölskylduherbergi.
