Steve Schreiber, 63 ára gamall flugstjóri til margra ára, segir að eitt smáatriði sem sést í myndbandi í aðdraganda flugslyssins á Indlandi í síðustu viku gefi mögulega til kynna hvað olli slysinu.
Farþegaþota Air India-flugfélagsins hrapaði til jarðar skömmu eftir flugtak frá borginni Ahmedabad á Indlandi á fimmtudag með þeim afleiðingum að 279 fórust. Af þeim 242 sem voru um borð í vélinni komst einn lífs af, Bretinn Vishwashkumar Ramesh.
Steve þessi heldur úti vinsælli síðu á YouTube undir nafninu Captain Steeeve þar sem hann deilir ýmsum fróðleik um flug. Hann segist hafa legið yfir myndbandsupptökum af slysinu á Indlandi síðustu daga og rekið augun í nokkuð sem gæti varpað ljósi á það hvað olli slysinu.
Hann grunar að tvöföld vélarbilun hafi orðið eftir að hafa séð svokallaða RAT-túrbínu koma niður úr vélinni þegar hún byrjaði að lækka skyndilega flugið.
„Margar flugvélar eru með þetta kerfi. Hún er rétt aftan við vænginn hægra megin á vélinni,“ segir hann og bætir við að túrbínan líti út eins og lítill utanborðsmótor.
Schreiber segir að tilgangur RAT sé að framleiða rafmagn eða vökvaþrýsting til bráðabirgða og í algjörri neyð ef aðalaflgjafar vélarinnar bregðast. Hann segir að þrjár ástæður geti valdið því að RAT-túrbínan kemur niður.
Click here to preview your posts with PRO themes ››
„Mjög umfangsmikil rafmagnsbilun, mikil bilun í vökvakerfi eða tvöföld vélarbilun,“ segir hann og bætir við að hver einasta af þessum þremur aðstæðum myndi valda því að túrbínan færi niður. Hann benti á skjáskot úr einu myndbandi af aðdraganda slyssins þar sem sjá má lítinn gráan punkt sem hann segir vera umrædda túrbínu. Þá vakti hann athygli á því að hljóð í myndbandinu styðji þessa kenningu.
Schreiber, sem hefur hátt í 30 ára reynslu af flugi, segir að RAT hafi upphaflega verið hannað sem „síðasta úrræði“ ef til mikillar bilunar kemur í mikilli flughæð. Kerfið sé ekki hannað til að taka við vélinni í 400 til 500 feta hæð og því hafi hún hrapað hægt og rólega til jarðar.
Schreiber tekur fram í myndbandinu að aðeins sé um kenningu að ræða, ekki verði neitt fullyrt fyrr en niðurstöður rannsóknar liggja fyrir.
