Sigurjón M. Egilsson, einn reyndasti fjölmiðlamaður landsins, gagnrýnir Bylgjuna harðlega vegna fréttar sem flutt var í hádegisfréttum í dag.
Samstöðin birti í gær athyglisvert viðtal við Jódísi Skúladóttur sem vakið hefur mikla athygli. Jódís var gestur Björns Þorlákssonar í Rauða borðinu þar sem hún lýsti því að henni hafi ofboðið áfengisneyslan á Alþingi við þinglokin í sumar.
Í frétt Bylgjunnar var rætt við Birgi Ármannsson, forseta Alþingis, og hann inntur eftir viðbrögðum við ummælum Jódísar. Þess var þó hvergi getið hvar Jódís lét ummælin falla og það sárnar Sigurjóni sem sjálfur er þáttastjórnandi á Samstöðinni.
Hann tjáði sig um málið á Facebook og sagði að þjófur gangi laus á Bylgjunni.
„Í hádegisfréttum Bylgjunnar var fjallað um áfengisdrykkju þingmanna. Fréttamaðurinn vitnaði til orða Jódísar Skúladóttur sem sagði frá drykkjunni í fínu viðtali sem Björn Þorláksson á Samstöðinni stýrði. Skömm Bylgjunnar er algjör. Hvergi var Samstöðvarinnar getið og ekki heldur Björns. Fréttin á Bylgjunni var því subbuskapur og reyndar fréttaþjófnaður. Hafi þeir skömm fyrir,“ segir Sigurjón sem stýrði þættinum Sprengisandi á Bylgjunni í mörg ár.
Click here to preview your posts with PRO themes ››
Björn Þorláksson þakkaði Sigurjóni fyrir að halda þessu til haga áður en hann deildi færslu hans og spurði: „Hvað segið þið? Eru vinir mínir á Bylgjunni með allt niður um sig?“
