Stjórnarmyndunarviðræður Samfylkingarinnar, Viðreisnar og Flokks fólksins hafa staðið yfir undanfarna daga. Kristrún Frostadóttir, formaður Samfylkingarinnar, segir í viðtali við RÚV að þær séu núna farnar að ræða ágreiningsmál.
„Við erum búin að ræða á síðustu dögum breiðu línurnar en erum núna komin og höfum verið að ræða álitamálin og höfum komist vel áfram í því,“ segir hún um gang viðræðnanna í dag.
Hún segir að ýmis álitamál hafi verið rædd, t.d. afstaða til aðildar að Evrópusambandinu sem nefndirnar séu búnar að tala sig í gegnum að stórum hluta.
„Við erum auðvitað bara meðvituð um það að við erum að koma inn í þessar stjórnarmyndunarviðræður í ákveðnu efnahagsástandi. Við tökum stöðu ríkisfjármála mjög alvarlega og viljum að það sé ákveðin ábyrgð í því sem við leggjum fram. Það er verið að ræða ákveðnar málamiðlanir þar innan,“ segir Kristrún ennfremur.
Click here to preview your posts with PRO themes ››
Stefnt er að því að fækka ráðuneytum og hefur verið rætt um breytt skipulag ráðuneyta. „Við erum auðvitað ekki að fara í fækkun ráðuneyta bara til að spara peninga, við viljum líka að það sé eðlilegt skipulag á hlutunum.“ Kristrún segir að mikilvægast sé að stjórnskipanin gangi upp.
Kristrún segir að viðræðunefndir flokkanna nálgist viðræðurnar bæði frá útgjalda- og tekjuhliðinni varðandi ríkisfjármál. Þær séu jafnframt að skoða hvernig megi hagræða.
Stefnt er að því að viðræður formannanna þriggja haldi áfram á morgun.
