Þrír hafa sett sig í samband við útgefanda bókarinnar „Leitin að Geirfinni“ og vitnað um að hafa heyrt gífurleg öskur og læti frá heimili Geirfinns Einarssonar í Keflavík, kvöldið sem hann hvarf, þann 19. nóvember árið 1974.
Frá þessu greinir útgefandi bókarinnar, Jón Ármann Steinsson, í viðtali við Bylgjuna í dag.
Jón greinir frá því að umrædd vitni hafi verið börn um þetta leyti og þau hafi búið í nágrenni við Geirfinn og fjölskyldu hans, að Brekkubraut 15 í Keflavík.
Jón segir ennfremur frá því að lögreglan í Keflavík hafi gengið hart fram í því að kveða niður sögusagnir um drápsöskrin og lagt hafi verið hart að börnum að þegja um þau. Jafnvel hafi lögregla komið í skóla með þennan boðskap á vörunum. Ennfremur hafi lögregla hótað blaðamönnum sem vildu ræða við nágranna Geirfinns því að þá fengju þeir engar upplýsingar um málið frá lögreglu. Hafi lögregla því stýrt fjölmiðlaumfjöllun um málið.
Sjá einnig: Telur minnst fjóra hafa verið á vettvangi er Geirfinni var ráðinn bani og miklu fleiri viti sannleikann í málinu
Aðstandendur bókarinnar stefna að því að koma upplýsingum um málið í hendur nýs dómsmálaráðherra eftir að ný ríkisstjórn hefur verið mynduð. Meðal þeirra upplýsinga er nafn manns sem segist hafa orðið vitni að drápi Geirfinns er hann horfði inn um bílskúrsglugga. Maðurinn var þá 10 ára gamall.
Click here to preview your posts with PRO themes ››
Jón segir að upplýsingar um drápsöskrin komi fram í lögregluskýrslum en síðan hafi sá þráður slitnað og einblínt hafi verið á þá rannsóknartilgátu að Geirfinnur hafi verið spírasmyglari sem hafi verið ráðinn bani í tengslum við þá iðju.
„Nú þarf að hafa hraðar hendur, það þarf að leysa þetta mál sem hefur hvílt eins og mara á þjóðinni,“ segir Jón.
Biðja um upplýsingar í gegnum Facebook-síðu
Jón óskar eftir því að fleiri stigi fram, sem kunna að hafa upplýsingar um málið, og hafi samband við sig. Best er að gera það í gegnum Facebook-síðuna Leitin að Geirfinni.
Senda skal einkaskilaboð inni á síðunni. Fullum trúnaði er heitið.
