Lögreglan á höfuðborgarsvæðinu fékk tilkynningu um 16 til 17 ára gamlan dreng með hníf við verslun Hagkaups í Skeifunni í gærkvöldi. Að sögn lögreglu var drengurinn þó ekki að hóta eða ógna með hnífnum og fannst hann ekki við leit lögreglu.
Lögregla fékk svo tilkynningu um umferðarslys þar sem önnur bifreiðin var óökufær á eftir. Annar ökumannanna var án ökuréttinda og er málið í rannsókn að sögn lögreglu.
Þá veitti lögregla ökumanni eftirför sem stöðvaði ekki þegar lögregla gaf honum merki þess efnis. Í skeyti lögreglu kemur fram að ökumaðurinn hafi þó ekki ekið yfir leyfilegum hámarkshraða og reyndi ekki að flýja lögreglu. Hann var að lokum króaður af með fleiri lögreglubifreiðum eftir nokkrar mínútur.
Útskýrði maðurinn að hann hefði verið að reyna að finna stað til að stöðva bifreiðina. Hann reyndist vera ölvaður og sviptur ökuréttindum. Hann var handtekinn en látinn laus að lokinni blóðsýnatöku.
Click here to preview your posts with PRO themes ››
Lögregla handtók tvo menn sem grunaðir eru um sölu og dreifingu fíkniefna. Fíkniefni og vopn; hnífur, piparúði og rafvopn fundust við leit í bifreið mannanna sem voru vistaðir í fangaklefa vegna rannsóknar málsins.
