„Í raun ættu öll sveitarfélög á landinu að bregðast við með sama hætti,“ segir Einar Sveinbjörn Guðmundsson, varaborgarfulltrúi Flokks fólksins, í aðsendri grein í Morgunblaðinu í dag.
Meirihlutinn í borgarstjórn mun í dag leggja fram tillögu þess efnis að gerð verði krafa um að ófaglærðir matráðar og annað starfsfólk sem ráðið er til starfa í eldhúsum Reykjavíkurborgar þurfi að sækja þar til gert öryggisnámskeið í meðferð og meðhöndlun matvæla áður en viðkomandi hefja þar störf.
„Í kjölfar þeirrar alvarlegu matareitrunar sem upp kom í leikskólanum Mánagarði fyrir nokkrum mánuðum síðan sem hafði alvarlegar afleiðingar fyrir heilsu barna er vilji til að draga lærdóm af málinu og bæta öryggis- og gæðaferla til að koma í veg fyrir að slíkt geti endurtekið sig. Tryggja verður öryggi og rétta meðhöndlun og meðferð matvæla með skilvirkri fræðslu. Skyldunámskeið myndi vera liður í að mæta þeirri þörf,“ segir í tillögu borgarfulltrúa meirihlutans.
Hátt í 50 börn veiktust eftir að hafa borðað e.coli-mengaðan mat í Mánagarði í október og eins og fram kom í fréttaskýringaþættinum Kveik í janúar hékk líf nokkurra barna á bláþræði eftir sýkinguna. Bent var á það að matráður leikskólans hefði ekki hlotið neina menntun eða fræðslu um öryggi matvæla og var orsök hópsmitsins rakin til rangs verklags við matreiðslu og geymslu á matnum sem borinn var fram.
Click here to preview your posts with PRO themes ››
Í grein sinni segir Einar Sveinbjörn að öryggisnámskeið af þessum toga, auk almennrar fræðslu um matseld, hafi verið haldið á vegum Reykjavíkurborgar áður. Það gerðist til dæmis árið 2022 og nefnir Einar að það hafi tekist vel „þrátt fyrir lélega mætingu“.
„Þarna skilur á milli hvernig þessum málum er háttað núna og þess hverju tillagan tekur á – að þátttaka á eins dags öryggisnámskeiði í meðferð og meðhöndlun matvæla sé ekki valkvæð heldur skylda,“ segir hann og bætir við að öryggir verkferlar séu eins og flestir vita nauðsynlegir til að hægt sé að tryggja rétta meðhöndlun á þeim mat sem borinn er á borð fyrir börn í leikskólum borgarinnar.
„Í raun ættu öll sveitarfélög á landinu að bregðast við með sama hætti – best væri ef hægt yrði að vera með á landsvísu samræmt öryggisnámskeið í meðferð og meðhöndlun matvæla þannig að öll börn á leikskólum landsins „sætu við sama borð“ hvað þetta varðar.“
