Fyrrverandi framkvæmdastjóri Stangaveiðifélags Reykjavíkur (SVFR), Ari Hermóður Jafetsson, hefur verið ákærður fyrir fjárdrátt í starfi sínu fyrir félagið. Meint brot voru framin á árunum 2017-2018.
Í ákæru er Ari sagður hafa dregið sér samtals 1.665.600 krónur. Í ákæru eru lýsingar á bókhaldsbrellum sem Ari á að hafa viðhaft í því skyni að láta félagið greiða fyrir sig veiðileyfi og tannlæknakostnað.
Málið kom upp árið 2020 en í desember það ár greindi Vísir frá því að Ari væri grunaður um að hafa braskað með veiðileyfi til eigin hagsbóta. Var hann kærður til lögreglu fyrir fjárdrátt um þetta leyti. Er því ljóst að málið hefur verið afar lengi í rannsókn.
Málið verður þingfest fyrir Héraðsdómi Reykjavíkur þann 9. desember næstkomandi. Búast má við því að réttarhöldin verði á fyrri hluta næsta árs.
