Guðmundur Ingi Guðbrandsson hefur ákveðið að gefa ekki áfram kost á sér sem varaformaður Vinstri grænna. Þetta tilkynnir hann í færslu á Facebook.
„Kæru vinir! Ég hef ákveðið að gefa ekki kost á mér til forystu hjá okkur Vinstri grænum á landsfundinum í byrjun mar,“ segir Guðmundur Ingi sem hefur verið í VG frá stofnun hreyfingarinnar og sinnt ýmsum trúnaðarstörfum. Svandís Svavarsdóttir tilkynnti í desember að hún myndi ekki gefa kost á sér til formennsku í flokknum.
Guðmundur Ingi varð umhverfis- og auðlindaráðherra árið 2017 sem utanþingsráðherra og var árið 2019 kosinn varaformaður VG. Tveimur árum síðar varð hann alþingismaður fyrir Suðvesturkjördæmi.
Þá var hann um tíma formaður flokksins eftir að Katrín Jakobsdóttir hætti og þar til Svandís Svavarsdóttir var kjörin formaður á síðasta landsfundi.
„Að sinna starfi ráðherra í sjö ár og vera í forystu stjórnarflokks sem fer fyrir ríkisstjórn er reynsla sem ég mun alltaf búa að og ég er óskaplega þakklátur fyrir traustið sem félagar mínir í VG og samstarfsfólk í ríkisstjórn og á Alþingi hafa treyst mér fyrir. Ég er gæfusamur maður að hafa fengið öll þessi tækifæri og fyrir þau þakka ég af auðmýkt, ekki síst Katrínu og félögunum í VG,” segir Guðmundur Ingi meðal annars.
Click here to preview your posts with PRO themes ››
Í yfirlýsingunni segist Guðmundur telja að Vinstri græn geti náð vopnum sínum aftur og orðið leiðandi á vinstri væng stjórnmálanna, í umhverfis- og náttúruverndarmálum og í baráttunni fyrir jöfnuði, mannréttindum og friði.
„Ég mun leggja mitt að mörkum til uppbyggingar hreyfingarinnar okkar, en ekki sem forystumaður hennar. Ég þakka öllum þeim sem hafa hvatt mig til að bjóða mig fram til forystu nú sem fyrr og útiloka ekki að gefa kost á mér í næstu alþingiskosningum. Ég brenn áfram fyrir réttlátu og sanngjörnu samfélagi þar sem er pláss fyrir okkur öll. Þar sem við finnum lausnir í umhverfismálum með gleraugum réttlætis og áttum okkur á því að það verður lítið rými í framtíðinni fyrir félagsleg gildi og mannréttindi ef við vinnum ekki bug á loftslagsbreytingum, mengun og tapi á líffræðilegri fjölbreytni. Sú umhverfisbarátta er barátta fyrir áframhaldandi tilveru og velferð okkar á jörðinni og skapar undirstöðu fyrir samfélag jöfnuðar og réttlætis. Fyrir þessum gildum öllum mun ég áfram berjast.“
