Helgi Bjartur Þorvarðarson, sem ákærður hefur verið fyrir húsbrot og kynferðisbrot gegn barni í Hafnarfirði aðfaranótt sunnudagsins 14. september, segist aldrei hafa fundið fyrir minnsta votti af barnagirnd. Hann lýsir yfir fullkomnu minnisleysi varðandi þau brot sem hann er sakaður um en lýsingar brotaþola og foreldra hans af málavöxtum eru skýrar og innbyrðis samkvæmar.
Svo virðist sem Helgi hafi verið yfirheyrður þrisvar hjá lögreglu vegna málsins, fyrst á sunnudeginum 14. september, því næst þann 16. september og loks 11. desember, en þá voru honum kynntar niðurstöður sænskrar rannsóknarstofu sem leiðir í ljós að lífsýni Helga fannst á klæðum drengsins sem hann er sagður hafa brotið á.
Sjá einnig: Helgi Bjartur ákærður fyrir að nauðga tíu ára dreng í Hafnarfirði
Ákveðið ósamræmi er í framburði Helga annars vegar í fyrstu tveimur yfirheyrslunum og hins vegar í þeirri þriðju. Í hinum fyrri tveimur segist hann hafa óljósa minningu um að hafa verið í húsi fjölskyldunnar í Hafnarfirði sem og að hann hafi verið að leita að húsinu þar sem hann vildi hitta móður drengsins. Í þriðju yfirheyrslunni lýsir hann hins vegar yfir fullkomnu óminni hvað varðar þetta.
Rauf eins árs bindindi
Samkvæmt yfirheyrslunum man Helgi betur eftir atvikum fram að meintu húsbroti í Hafnarfirði. Hann greinir frá því að eftir að hafa haldið upp á afmæli sonar síns hafi hann fengið sér áfengi á bar með vini sínum. Rauf hann þar eins árs bindindi en hann hafði farið í áfengismeðferð einu ári áður. Undanfarið hafi mikið álag og slakari sókn á AA-fundi leitt til þess að áfengislöngunin hafi vaknað á ný. Hann greinir einnig frá því að hann hafi farið í hjáveituaðgerð sem hafi gert hann viðkvæmari en ella fyrir áfengi.
Click here to preview your posts with PRO themes ››
Helgi greindi lögreglu einnig frá því að hann hefði keypt sér kókaín og tekið inn lítilsháttar magn af því ofan í áfengið. Hann segir einnig frá því að hann hafi keypt þjónustu vændiskonu í Bolholti og tekið þangað leigubíl. Hann hafi síðan einnig tekið leigubíl til baka til Hafnarfjarðar. Hann segist hafa greitt fyrir leigubílinn með síma sínum. Hann segist hins vegar hafa eytt samskiptum sínum við vændiskonuna úr símanum. Helgi greinir frá því að hann hafi ekki „náð honum upp“ með vændiskonunni.
Aðspurður segist Helgi veita lögreglu fullt leyfi til að rannsaka símann sinn, en lögregla vildi sannreyna upplýsngar hans um ferðir hans sem og að kanna hvort barnaníðsefni væri á símanum. Sími Helga hefur hins vegar aldrei fundist.
Segir móður drengsins vera sína bestu vinkonu
Helgi segist hafa litið á móður drengsins sem hann er sagður hafa brotið gegn sem sína bestu vinkonu en þau unnu saman um skeið. Hann segist þó sjaldan hafa hitt hana seinni árin og eingöngu verið í samskiptum við hana rafrænt. Hann segist hafa komið á heimili hennar árið 2022 í vinnustaðapartý.
Aðspurður segir Helgi að ekkert ástar- eða kynferðislegt samband hafi verið á milli þeirra. Honum finnist hún samt vera mjög myndarleg og aðlaðandi.
Helgi útilokar að hann hafi ruglast á drengnum og móðurinni er hann framdi meint brot og ber sem fyrr segir við fullkomnu minnisleysi um þessa atburði.
Eins og fram kom í fjölmiðlum í gærkvöld hefur Héraðsdómur Reykjaness hafnað kröfu Héraðssaksóknara um gæsluvarðhald yfir Helga og gengur hann því enn laus eins og hann hefur gert allt frá því í september en hann sat þá þrjá daga í gæsluvarðhaldi við upphaf rannsóknar málsins.
