Maður sem ákærður var fyrir að hafa banað eiginkonu sinni á Akureyri aðfaranótt mánudagsins 22. apríl var í dag sakfelldur fyrir Héraðsdómi Norðurlands eystra og dæmdur í 12 ára fangelsi.
Þetta upplýsir saksóknari í málinu, Dagmar Ösp Vésteinsdóttir, í samtali við DV. Hún hefur ekki fengið dóminn í hendur og getur því ekki sagt til um fyrir hvað maðurinn var sakfelldur en hann var bæði ákærður fyrir manndráp og brot í nánu sambandi.
Dómurinn var kveðinn upp kl. 14 í dag en hefur ekki verið birtur á vefsíðu dómstólanna.
Samkvæmt ákærunni lést konan í kjölfar mikilla misþyrminga af hálfu mannsins.
Uppfært kl. 16:20
Samkvæmt frétt RÚV var maðurinn sakfelldur fyrir brot í nánu sambandi og stórfellda líkamsárás, en ekki fyrir manndráp.
Honum er gert að greiða átta milljónir króna í miskabætur til aðstandenda hinna látnu.
