Sigurður Þ. Ragnarsson, betur þekktur sem Siggi stormur, segir að vegfarendur þurfi að vera búnir undir erfiða færð á suðvesturhorni landsins í dag. Veðurstofan spáir snjókomu í dag og gæti færð spillst til dæmis á Reykjanesbraut og á Hellisheiði.
Sigurður fór yfir veðrið í viðtali í Bítinu á Bylgjunni í morgun og hann var meðal annars spurður út það hvort spáin væri að fara rætast og hvort enn væri von á snjókomu.
„Já, það má eiginlega segja það en vindurinn er reyndar aðeins minni en leit út fyrir í gær,“ sagði Sigurður og bætti við að úrkoman byrji sem „fjúk“ og þegar líður á daginn, um tvö leytið, verði snjókoman meira áberandi með strekkingsvindi.
„Það eru engin læti með vind í þessu en það getur alveg fokið til,“ sagði hann og bætti við að þó að snjókoman þróist yfir í rigningu þegar líður frekar á daginn gæti komið tímabil sem verður erfitt fyrir bíla.
Sigurður segir að nú séu breytingar fram undan í veðrinu eftir rólyndis veður síðustu vikurnar.
„Við erum eiginlega lent í því að þetta er dagurinn sem öllu breytti, nú erum við að fá eðlilegri stöðu að segja má. Við erum með lægðagang fram undan sem er ávísun á mjög misskipt veður. Meginlandið er að fá hlýindin sem hafa verið suður í höfum og hafa ekki náð inn á meginlandið sem er búið að vera í miklum kuldum,“ sagði hann í Bítinu.
Click here to preview your posts with PRO themes ››
Hann segir að veðurspár, bæði frá Evrópu og Bandaríkjunum, séu nokkuð samstíga varðandi daginn í dag og gera megi ráð fyrir úrkomu á vesturhelmingi landsins, fyrst í formi snjókomu í höfuðborginni, Reykjanesi og á láglendi á Suðurlandi. Það mun svo hlýna þegar líður á daginn og þá verður úrkoman í formi slyddu eða rigningar.
Lögreglan á Suðurnesjum hvatti vegfarendur á vanbúnum bílum til að halda ekki af stað vegna yfirvofandi snjókomu. Sigurður segist reyndar hafa minni áhyggjur af Reykjanesbrautinni en Hellisheiði þar sem vindurinn verður hægari en við áttum von á.
„Þá verður skyggnið ekki eins slæmt á meðan snjókoman gengur yfir. Hellisheiðin nær ekki að fara upp fyrir frostmark og þar verðum við í frosti og snjókomu. Það er rétt að taka það fram að það er svolítið magn í þessu, þessir staðir sem þú nefndir eru í skotlínunni.“
Heimir Karlsson, þáttastjórnandi Bítisins, spurði Sigurð svo að lokum hvort eitthvað sæist lengra fram í tímann – næsti mánuður jafnvel. Sigurður sagði að langtímaspár, eða svokallaðar veðurlagsspár, bentu til þess að við værum að detta inn í rysjótta tíð á suður- og suðvesturhluta landsins en veðrið norðan- og austanlands yrði að líkindum skaplegra.
Hér er hægt að fylgjast með færð á vegum.
