Viðreisn er á gríðarlegu flugi í skoðanakönnunum nú þegar innan við mánuður er til kosninga.
Samkvæmt niðurstöðum nýrrar könnunar Prósents, sem unnin var fyrir Morgunblaðið, er Viðreisn nú með 18,5% fylgi en í könnun þann 18. október var fylgið 14,1%.
Samfylkingin mælist sem fyrr stærsti flokkurinn en heldur hefur hallað undan fæti hjá flokknum í síðustu skoðanakönnunum. Samkvæmt könnuninni mælist Samfylkingin með 22,3% fylgi en var 24,8% fyrir hálfum mánuði. Ekki er marktækur munur á fylgi Samfylkingarinnar og Viðreisnar.
Miðflokkurinn er örlítið stærri en Sjálfstæðisflokkurinn sem hefur unnið á frá síðustu könnun. Miðflokkurinn mælist með 14,4% fylgi en Sjálfstæðisflokkurinn 14,1%. Flokkur fólksins er á svipuðum slóðum og í síðustu könnunum og mælist fylgi hans nú 11,2%.
Framsóknarflokkurinn er á svipuðu róli og áður og mælist fylgi hans 5,8%. Píratar eru á barmi þess að detta út af þingi ef niðurstöður kosninga verða í samræmi við könnun Prósents. Fylgi flokksins mælist nú 4,9%. Sósíalistar mælast með 4,0% og Vinstri grænir 2,6%. Lýðræðisflokkurinn er með 1,5% fylgi og Ábyrg framtíð 0,4%.
Click here to preview your posts with PRO themes ››
Könnunin var gerð dagana 25.-31. október og var úrtakið 2.400 manns og 1.195 svör bárust.
