Vilhjálmur gagnrýndi Range Rover-ummæli Stefáns Einars sem var ekki lengi að svara fyrir sig

Vilhjálmur Birgisson, formaður Starfsgreinasambandsins og formaður Verkalýðsfélags Akraness, segir það vera eins og góðan skets úr smiðju Fóstbræðra þegar harðir Sjálfstæðismenn gera gjaldfrjálsar skólamáltíðir tortryggilegar.

Vilhjálmur lýsti þessari skoðun sinni á Facebook-síðu sinni í gær en tilefnið er viðtal Stefáns Einars Stefánssonar, þáttastjórnanda á mbl.is, við Ásmund Einar Daðason, mennta- og barnamálaráðherra um gjaldfrjálsar skólamáltíðir. Deildi Vilhjálmur frétt Morgunblaðsins þar sem brot úr viðtalinu birtist.

Börnin í Garðabæ

Í viðtalinu saumaði Stefán nokkuð hart að Ásmundi Einari og benti á að kennarar hefðu kvartað undan því að það vantaði meiri stuðning inn í skólastofurnar. Það vanti augljóslega pening í menntakerfið en á sama tíma sé tekið upp á því að gera skólamáltíðir fríar fyrir alla grunnskólanemendur.

Í viðtalinu sagði Stefán Einar meðal annars:

„Hvaða til­gangi á það að þjóna að veita fjár­magni sem er af skorn­um skammti í það að borga niður skóla­máltíðir fyr­ir þúsund­ir barna, sem koma frá heim­il­um, tug­ir þúsunda barna, frá heim­il­um sem geta vel borgað fyr­ir þess­ar máltíðir og gera það með glöðu geði? Af hverju var ekki hægt að hafa kerfið með sama hætti og áður var að for­eldr­ar efnam­inni heim­ila gátu fengið aðstoð við að greiða fyr­ir þetta, af hverju þurfa börn­in í Garðabæ, sem skutlað er í skól­ann á 30 millj­óna Range Roverum að fá þess­ar skóla­máltíðir frí­ar?“

Vilhjálmur gagnrýndi meðal annars þennan málflutning Stefáns í færslu sinni.

„Það er eins og virkilega góður skets úr smiðju Fóstbræðra þegar harðir sjálfstæðismenn gera gjaldfrjálsar skólamáltíðir tortryggilegar og nota haldlaus rök að verið sé að hygla ríka og stóreignafólkinu með því að tryggja jöfnuð í grunnskólunum með gjaldfrjálsum skólamáltíðum.  Þetta er svo grátbroslegt enda hefur það verið eitt af „aðalverkefnum“ Sjálfstæðisflokksins á liðnum árum og áratugum að verja og tryggja hagsmuni þeirra efnameiri.“

Click here to preview your posts with PRO themes ››

Grátbroslegt

Vilhjálmur kveðst vera afar stoltur af verkalýðshreyfingunni að hafa tekist að knýja fram gjaldfrjálsar skólamáltíðir í grunnskólum um land allt.

„Aðgerð sem mun svo sannarlega koma þeim sem höllustum fæti standa í íslensku samfélagi til góða að ógleymdri allri millistéttinni sem berst í bökkum vegna okurvaxta, verðtryggingar og síhækkandi framfærslukostnaðar á öllum sviðum heimilisrekstrar,“ sagði Vilhjálmur og bætti við:

„Að gera fríar skólamáltíðir handa öllum grunnskólabörnum tortryggilegar er grátbroslegt, sérstaklega þegar það kemur úr ranni stjórnmálaflokks sem hefur verið dyggasti varðhundur þeirra ríku og efnameiri. Að finna gjaldfrjálsum skólamáltíðum í grunnskólum allt til foráttu er sorglegt og það byggt á rökum að verið sé að „gefa“ ríka fólkinu úr Garðabæ sem komi á 30 milljóna króna jeppa og fái fríar skólamáltíðir handa börnunum sínum.“

Spurði hann svo hvernig væri að Sjálfstæðisflokkurinn næði í pening af ríka fólkinu með því að hækka fjármagnstekjuskatt hjá hinum ofurríku. „10 tekjuhæstu einstaklingarnir  í Garðabæ voru með upp undir 10 milljarða í fjármagnstekjur!  Af þessum 10 milljörðum greiða þeir einungis 22% skatt og ekki ein króna af þessum tekjum fer til sveitarfélagsins.“

„Eins og gömlu kommarnir“

Stefán Einar svaraði Vilhjálmi fullum hálsi og sparaði ekki stóru orðin.

„Vilhjálmur Birgisson þú ert bara eins og gömlu kommarnir. Þolir ekki einu sinni umræðuna. Villt bara fá þínar fimm mínútur til að froðufella um allan heimsósómann en ekki taka ábyrgð á neinu. Þegar valdamenn koma í settið til mín læt ég þá hafa fyrir ákvörðunum sínum, en þá stíga fram menn eins og þú og kalla mig öllum illum nöfnum, saka mig um annarlegar hvatir og ég veit ekki hvað og hvað. Það er ekki skrítið að enginn taki þetta alvarlega. Væri ekki nær að þú einbeittir þér að því að verja atvinnulífið á Akranesi, í stað þess að taka í sífellu þátt í að bregða fyrir það fæti?“